Г.Аянга¹, Л.Давааням², Н.Пүрэвжав², Г.Ариунтуул²

¹ЭНЭШТ, ²ЭМШУИС, НАСС

Тагнайн төрөлхийн сэтэрхийн мэс заслын эмчилгээг хийх тохиромжтой насны тухай асуудал одоог хүртэл төгс шийдэгдээгүй, маргаантай асуудал байгаа билээ. Энэ мэс заслын гол зорилго нь хэл яриа, сонсголын хэвийн хөгжлийг хангахаас гадна хоншоор яс, улмаар нүүрний дунд хэсгийн хөгжлийг саатуулахгүй байх явдал юм. Үүний тулд энэ мэс заслыг эрт хийвэл (24 сараас өмнө) цаашдаа өвчтөний хэл яриа болон сонсгол хэвийн хөгжих боломж нэмэгдэх (1) бол хожуу буюу 4 наснаас хойш хийх нь хоншоор ясны хөгжилтийг саатуулахгүй байх (2,3) нөхцөл болно. Иймд тагнайн төрөлхийн сэтэрхийн мэс заслын эмчилгээний тохиромжтой насны тухай асуудал нь хэл яриаг зөв хөгжүүлэх гол нөхцөл болсон тагнайн бүтэц, үйл ажиллагааг сэргээх, ингэхдээ хоншоор яс, нүүрний дунд хэсгийн өсөлтийг зогсоохгүй байх тийм насыг олж сонгох явдал юм.